දකුණු අප්‍රිකානු ක්‍රිකට් කණ්ඩායමේ කඩුළු රකින ක්‍රීඩක ක්වින්ටන් ඩි කොක් හදිසියේම ටෙස්ට් පිටියට සමුදීමට තීරණය කර ඇත. ඒ් සිය පවුලේ සාමාජිකයින් සමගින් වැඩිපුර කාළය ගත කිරීම වෙනුවෙනි. ඩි කොක්ගේ බිරිඳ ඉදිරි දින කිහිපය තුළදී සිය පළමු දරු ප්‍රසූතියට සූදානම් වන අතර ඒ හේතුවෙන් ඩි කොක් ඉන්දියාව සමගින් පැවැත්වීමට නියමිත දෙවැනි හා තෙවැනි ටෙස්ට් තරගවලින්ද ඉවත්වීමට නියමිතව සිටියේය.
කෙසේ වෙතත් ඔහු ඉන් අනතුරුවද නිත්‍ය වශයෙන්ම ටෙස්ට් පිටියෙන් සමුගැනීමට තීරණය කර එක්දින හා පන්දුවාර 20 අංශ කෙරෙහි වැඩි අවධානයක් යොමුකිරීමට තීරණය කර ඇති බව දන්වා ඇත.
දකුණු අප්‍රිකානු ටෙස්ට්, එක්දින හා පන්දුවාර 20 යන අංශ ත්‍රිත්වයේම නිත්‍ය කඩුළු රකින්නා හා ප්‍රහාරාත්මක පිතිකරුවෙකුද වන කොක් ටෙස්ට් ඉනිම් 91 කදී ශතක 6 ක් හා අර්ධ ශතක 22 ක් සමගින් රැස් කරගෙන ඇති සමස්ථ ලකුණු සංඛ්‍යාව 3300 කි.
