අග්‍රාමාත්‍ය මහින්ද රාජපක්ෂ මහතාගේ බාල පුතු වන රෝහිත රාජපක්ෂ ඉදිරියේ ආරම්භවන අන්තර් ක්‍රීඩා සමාජ එක්දින ක්‍රිකට් තරගාවලියට ක්‍රීඩා කිරීමේ බලාපොරොත්තුවෙන් සිටින බව වාර්තා වේ.
වත්මන් ක්‍රීඩා අමාත්‍ය නාමල් රාජපක්ෂ මහතාගේද බාල සහොදරයා වන රෝහිත රාජපක්ෂව, කළුතර ප්‍රදේශයේ ක්‍රීඩා සමාජයක් නියෝජනය කරමින් තරග බිමට පිවිසීමේ සූදානමින් සිටියි.
මේ වනවිට පුහුණුවීම් කටයුතු ද ආරම්භ කර ඇති ඔහු ඊයේ (12දා) සහ අද (13දා) දිනයේදී මග්ගොන සරේ ක්‍රීඩාංගනයේදී පුහුණු තරගයකටද සහභාගි වී ඇත.
ක්‍රිකට් ක්‍රීඩාව තෝරාගැනීමට පෙර රෝහිත රාජපක්ෂ රග්බි ක්‍රීඩකයෙක් වන අතර, ඔහු යුද හමුදා ක්‍රීඩා සමාජය මෙන්ම කොළඹ සි.එච්. ඇන්ඩ් එෆ්.සී. ක්‍රීඩා සමාජය නියෝජනය කරමින් මෙරට පැවැත්වෙන ප්‍රධානතම අන්තර් සමාජ පළමු පෙළ රග්බි තරගාවලියට ක්‍රීඩා කර ඇත.
