ත්‍රීරෝද රථ ගාස්තු ඉහල දැමීමට ත්‍රිරෝධ රථ රියදුරන්ගේ සංගමය තීරණය කර තිබේ.

ඒ අනුව පළමු කිලෝමීටරයක් සඳහා රුපියල් 80ක උපරියමක් දක්වාත් දෙවන කිලෝමීටරයේ සිට රුපියල් 45ක් දක්වාත් මිල ඉහල දැමීමට අද (21) සිට පියවර ගන්නා බව එම සංගමයේ සභාපති ලලිත් ධර්මසේන සඳහන් කරයි.

“අපි තීන්දු කරලා තියෙනවා මේ වෙලාවේ පළමු කිලෝමීටරයට රු 80ක උපරිමයකටත් දෙවන කිලෝමීටරයේ සිට රු 45 දක්වා යන්න. මේකට හේතුව තමයි මේ වැඩිවෙලා තියෙන බඩු භාණ්ඩ සියලුම දේවල් වැඩිවෙලා තියෙද්දි අපේ අය ජීවත් වෙන්න ඕනේ මේ ත්‍රීවිල් රස්සාව කරලා. මේ වෙද්දි කම්පැනිවලින් මගියාව සුරාකමින් තියෙනවා. ත්‍රීරෝද රථ නියාමනය සම්බන්ධයෙන් අපි අවුරුදු 20ක් පමණ ඉඳලා කතා කරනවා ගාස්තු සමාලෝචන කමිටුවක්. නියාමනය ඇතුළේ මේ දේ කරලා දෙන්න කිව්වහම තව තවත් කල්ඇරීමෙන් මේක අයාලේ යනවා. අපි කියනවා මේ වෙලාවේ ගාස්තු සමාලෝචන කමිටුව තුළින් වෘත්තීය රියදුරා හඳුනාගැනීමේ වැඩපිළිවෙලක් අපි බලාපොරොත්තු වෙනවා.”

මේ අතර ඉන්ධන මිල ඉහල යාමත් සමග රුපියල් 14ක් වන අවම බස් ගාස්තුව රුපියල් 25ක් දක්වා ඉහල දැමීමට පෞද්ගලික බස් සමාගම් යෝජනා කර තිබේ.

ඒ අනුව ජනාධිපතිවරයා මැදිහත්ව මේ සඳහා විසඳුමක් ලබා දෙනු ඇති බව පෞද්ගලික බස් හිමියන්ගේ සංගමයේ සභාපති ගැමුණු විජේරත්න සඳහන් කරයි.