අධිකරණය සඳහා වාර්තාධිකාරී විනිසුරුවරුන් පත් කිරීම් දේශපාලඥයන්ට පැවරීම සුදුසු නැතැයි අධිකරණ අමාත්‍ය ජනාධිපති නීතීඥ අලි සබ්රි සඳහන් කරයි.
අද (09) පාර්ලිමේන්තුවේදි අදහස් දක්වමින් ඔහු සඳහන් කරනුයේ එම පත්කිරීම් දේශපාලන අධිකාරියෙන් එළියට ගෙන අධිකරණ සේවා කොමිෂන් සභාවට පැවරිය යුතු බවයි.
අපරාධ නඩු විධාන සංග්‍රහය (සංශෝධන) පනත් කෙටුම්පත පිලිබඳ දෙවන වර කියවීමේ විවාදයේදී අදහස් දක්වමින් ඔහු මේ පිලිබඳව අදහස් දැක්වීය.
නඩු ඇසීමට වෙනම විනිසුරුවරුන්ද නඩු විභාග සූදානම සඳහා වාර්තාධිකාරී විනිසුරුවරුන්ද පක් කිරීමට කටයුතු කරගෙන යන බව පැවසු අධිකරණ අමාත්‍යවරයා සඳහන් කරනුයේ නීතියේ නව නැම්මක් ඇති කිරීම මෙහි අරමුණ බවයි.
නීතියේ ආධිපත්‍යය ගැන වර්ථමානයේ ජනතාවට ලොකු හැඟීමක් නොමැති බවත් නීතියේ පාලනය ගැන විශ්වාසය වැඩිවූ විට නඩු කියන ප්‍රමාණයද වැඩිවිය හැකි බවත් ඔහු පැවසීය.
නීතියේ ප්‍රමාදය වර්ථමානයේ පවතින බරපල ප්‍රශ්නයක් බවත් එක්තරා අතවරයක් පිලිබඳ නඩුවක තීන්දුව ප්‍රකාශ කිරීමට අවුරුදු විස්සක් ගතවූ බවද සඳහන් කලේය.
එමෙන්ම එක්තරා නඩුවක සාක්ෂිකරුවෙකුගෙන් සාක්ෂි ලබා ගැනීමට වසර හතක් ගතවී ඇතැයි ඔහු පැවසීය.
