මාධ්‍යවේදී චමුදිත සමරවික්‍රම මහතාගේ නිවසට එල්ල වූ මැර ප්‍රහාරය පිළිබඳව අපක්ෂපාතී පරීක්ෂණයක් පවත්වා ඊට සම්බන්ධ සියලුදෙනා වහා අත්අඩංගුවට ගත යුතු බව එක්සත් ජාතික පක්ෂ සභාපති, හිටපු අමාත්‍ය වජිර අබේවර්ධන පවසයි
අද (15) දහවල් පිලියන්ද පිහිටි මාධ්‍යවේදී චමුදිත සමරවික්‍රමගේ නිවසට ගොස් ඔහු හා සාකච්ඡා කිරීමෙන් අනතුරුව පැවැත්වූ මාධ්‍ය හමුවකදී ඔහු මේ බව පැවසීය.
ලෝකයේ තාක්ෂණය ඉතා දියුණු මට්ටමක තිබෙන බැවින් ප්‍රහාරය එල්ල කළ අය මුහුණු ආවරණය කරගෙන පැමිණියත් අවශ්‍යතාවයක් තිබෙනවානම් නව තාක්ෂණය භාවිතාකර අපරාධකරුවන් නීතියේ රැහැනට හසුකර ගත හැකි බව ඔහු පෙන්වා දෙයි.
ඉන් අනතුරුව එම නිවසට රැස්ව සිටි මාධ්‍යවේදීන් මෙම ප්‍රහාරය සම්බන්ධව එක්සත් ජාතික පක්ෂයේ ස්ථාවරය කුමක්දැයි විමසා සිටි අවස්ථාවේ ඊට පිළිතුරු දෙමින් වජිර අබේවර්ධන මහතා තවදුරටත් මෙසේද පැවසීය.
“ශ්‍රී ලංකාවේ මාධ්‍ය නිදහස, නිදහස්ව තිබිය යුතුයි කියලා එක්සත් ජාතික පක්ෂය විශ්වාස කරනවා. ඒ නිසා සෑම අවස්ථාවකම මාධ්‍යවේදීන්ගේ ආරක්ෂාව පිළිබඳ රජය විශේෂ අවධානයක් යොමු කළ යුතුව තිබෙනවා.
මේ එල්ල වූ ප්‍රහාරය ඉතාමත් මිලේච්ඡ ක්‍රියාවක් කියලා මං හිතනවා. අපි ඒ ගැන කණගාටු වෙනවා. මේ සිද්දිය සම්බන්ධයෙන් වහාම පරීක්ෂණ කරලා, තිබෙන නව තාක්ෂණය ඔස්සේ මේ සියලු අපරාධකරුවන් අත්අඩංගුවට ගැනීමට හැකියාව තිබෙනවා.
ලෝකයේ තාක්ෂණය ඉතාමත් දියුණු මට්ටමකයි අද තිබෙන්නේ. ඒ නිසා කොයි ආකාරයකින් මුහුණු ආවරණය කරගෙන ආවත්, අවශ්‍යතාවය තිබෙනවානම් අපරාධකරුවන් සොයාගත හැකියි.
ශ්‍රී ලංකාවේ මාධ්‍ය නිදහසට කුමන අයුරකින් හෝ ඇතිවන තර්ජන කිසිසේත්ම අනුමත කරන්න බැහැ. ඕනෑම කාරණයක් සාකච්ඡාවෙන් සහ සම්බන්ධවීමෙන් විසඳාගන්න හැකියාව තිබෙනවා. මාධ්‍ය නිදහසට තර්ජනයක් වන ආකාරයෙන් වෙන සෑම ක්‍රියාවක්ම එක්සත් ජාතික පක්ෂය තරයේම හෙළා දකිනවා. මෙම සිද්ධිය පිළිබඳව අපක්ෂපාතී පරීක්ෂනයක් පවත්වා ඊට සම්බන්ධ සියලුදෙනාටම එරෙහිව නීතිය ක්‍රියාත්මක කළ යුතුයි.”
