චීනයේ පැවැත්වෙන ශීත සෘතු ඔලිම්පික් උළෙල නියෝජනය කරන යුක්‍රේන ජාතික ක්‍රීඩක ව්ලැඩ්ස්ලාව් හෙරස්කෙවිච් තමන් සහභාගී වූ ස්කෙල්ටන් තරගය අවසානයේ යුක්‍රේනයට යුද්ධයක් අවශ්‍ය නැතැයි යන හැඟීම ප්‍රකාශ වෙන අයුරින් ප්‍රදර්ශනය කරන ලද පුවරුවක් සම්බන්දව ජාත්‍යන්තර ඔලිම්පික් කමිටුව විසින් සමාව ලබා දී ඇත.
මේ වනවිට රුසියාව විසින් යුක්‍රේනය ආක්‍රමණය කරන පසුබිමක යුක්‍රේනය ඉන් ගලවාගන්නට ලෝකයට සිදු කරන පණිවිඩයක් ලෙස ව්ලැඩ්ස්ලාව් ගේ පුවරුව ඔලිම්පික් නීති උල්ලංඝනය කලේද යන්න සළකා බැලීමෙන් අනතුරුව එය සාමය උදෙසා කරන ලද ප්‍රකාශයක් ලෙස ජාත්‍යන්තර ඔලිම්පික් කමිටුව විසින් තීරණය කර ඇත.
ඔලිම්පික් ක්‍රීඩාංගන, ස්ථාන හෝ වෙනත් ප්‍රදේශයක කිසිදු ආකාරයක පෙලපාලි හෝ දේශපාලන, ආගමික හෝ වාර්ගික ප්‍රචාරණයකට අවසර නොමැති බවට ඔලිම්පික් කමිටු ප්‍රඥප්තියේ පස්වන රීතියේ සඳහන්වන අතර එය පාදක කර ගනිමින් ව්ලැඩ්ලාව් විසින් ඉදිරිපත් කර තිබූ පුවරුව නීතී රීති උල්ලංඝණය කලේද යන්න සළකා බලා තිබුණු බවද විදෙස් මාධ්‍ය වාර්තා කරයි.
