දුම්රිය ස්ථානාධිපතිවරුන්ගේ සංගමය විසින් ක්‍රියාත්මක කර ඇති පැය 24ක වැඩවර්ජනය හේතුවෙන් දුම්රිය මගීන්ට ඇතිවන අපහසුතාවන්ට තම සංගමය වගනොකියන බව දුම්රිය ස්ථානාධිපතිවරුන්ගේ සංගමයේ සභාපති සුමේධ සෝමරත්න සඳහන් කරයි.
මෙම වැඩ වර්ජනය හේතුවෙන් ප්‍රධාන මාර්ගයේ දුම්රිය ධාවනයට විශාල ලෙස බාධා එල්ල වී ඇති අතර දැඩි දුම්රිය ප්‍රමාධයක් මෙන්ම ඇතැම් දුම්රිය අවලංගු වීමක්ද සිදුව ඇතැයි සඳහන්.
එමෙන්ම මුහුදුබඩ දුම්රිය මාර්ගයේ ප්‍රමාධ වී දුම්රිය ධාවනය සිදුවුවත් දුම්රිය ගේට්ටු ක්‍රියාත්මක නොවීම නිසා අනාරක්ෂිත තත්වයක්ද මතුව ඇතැයි වාර්තා වෙයි.
කෙසේ වෙතත් තම සංගමයේ වැඩවර්ජනය හේතුවෙන් ඇතිවන අපහසුතාවට දුම්රිය සාමාන්‍යාධිකාරිවරයා ඇතුලු පරිපාලනය වගකිව යුතු බවද සභාපතිවරයා සඳහන් කරයි.
දුම්රිය ස්ථානාධිපතිවරුන්ගේ ඉල්ලීම්වලට යහපත් ප්‍රතිචාර නොලැබීම, සාමාන්‍ය දුම්රිය කාලසටහන ක්‍රියාත්මක කිරීම ප්‍රමාද කිරීම සහ හිටියහැටි දුම්රිය අවලංගු කිරීම ආදී කරුණු කිහිපයකට විරෝධය දක්වමින් මෙම සංකේත වැඩ වර්ජනය ක්‍රියාත්මක කරන බවද ඔහු සඳහන් කරයි.
